என் அம்மா எப்போதும் சொல்வார்
“ சில நேரங்களில், ஒரு தவறான ரயிலால் கூட உங்களைச் சரியான ரயில் நிலையத்திற்கு அழைத்துச் செல்ல முடியும்” என்று நவாஸூதீன் சித்திக் இர்பானிடம் ரயில் பயணத்தின் போது சொல்வார், இர்பான் புன்னகைப்பார்.
அந்த புன்னகை முப்பத்தி ஜந்து வருட அரசுப் பணியில் பணிபுரிந்த, மனைவியை இழந்த பெர்னாண்டஸின் முகத்தில் தவழ நேர்ந்த கதையே The lunch box.
படத்தில் நிறைய காட்சிகள், எழுதத் தொடங்கினால் எழுதிக் கொண்டே போகலாம். வழக்கமாக கணவனக்கென்று ருசி பார்த்து அதில் அன்பையும் சேர்த்து சமைத்து மும்பையின் புகழ்பெற்ற டப்பா வாலக்களின் மூலமாக மதிய உணவை அனுப்பி வைக்கிறாள் இலா. ஒவ்வொருநாளும் அனுப்பிய டிபன் கேரியரில் ழுழுவதுமாக உணவு உண்ணப்படாமலேயே திரும்பி வரும். ஆனால் அன்று மட்டும் வழக்கத்திற்கு மாறாக இலாவின் கணவருக்கு செல்லாமல் டிபன் கேரியர் தவறுதலாக பெர்னாண்டஸிடம் வந்து சேர்கிறது. அன்றைய தினம் டிபன் கேரியரில் வைத்து அனுப்பப்பட்ட உணவு முழுவதுமாக உண்ணப்பட்டுக் காலியாக திரும்பி வருகிறது. அதனை எப்போதும் சாப்பாட்டுப் பையினைத் தூக்கிப் பார்த்தே அதைத் தெரிந்துக் கொள்வாள் இலா. ஒவ்வொருநாளும் அதில் கலந்திருக்கும் அன்பை முகர்ந்து பார்த்தே அறிந்துக் கொள்கிறான் பெர்னாண்டஸ், அதன் பின்னால் டிபன் கேரியர் கனமாக வருவதேயில்லை அவளிடம்.
தன் கணவனிடமிருந்து குறைந்தபட்ச அன்பு கூடக் கிடைக்கப் பெறாத இலா, இளமையிலேயே மனைவியை இழந்து, தான் பார்த்து வருகிற அரசுப் பணியிலிருந்து ஓய்வு பெறுகிற காலம் வரும் வரையில் தன்னந்தனியாகவே வாழ நேர்ந்த சாஜன் பெர்னாண்டஸ். இவ்விருவருக்கும் இடையில் டிபன் கேரியர் வழியாக டப்பா வாலாக்களின் வழியாக பயணிக்கிற கடித பரிமாற்றமும் அதனூடாக இருவருக்குள்ளும் நிகழத்துவங்குகிற அன்பும் அக்கறையும் கரிசனமும் தான் 'The lunch box'.
தனிமையின் பிடியில் கிட்டத்தட்ட தன் வாழ்நாள் முழுவதையுமே கழித்து விட்ட சாஜன் பெர்ணான்டஸின் கண்களில் எந்நேரமும் இழையோடுகிற மென்சோகத்தை அத்தனை எளிதில் கடந்து விட முடியாது. அது எப்போதும் இர்பான்கானின் கண்களிலேயே தவழுகிற ஒன்றுதான் என்றாலும் கூட அது இந்தப் படத்திற்கும் இந்தக் கதாபாத்திரத்திற்கும் கூடுதல் பலம், உயிர்.
இலாவாக வருகிற நிர்மத் கவுர் ஒவ்வொரு நாளும் தன் கணவனுக்காக ஆசையாசையாக உணவு பதார்த்தங்களை சமைத்து அது எப்படி இருந்தது? என்ன நிறை என்ன குறை? அவனுக்கு அது பிடித்திருந்ததா என்று தெரிந்துக் கொள்ள அவனிடம் கேள்விக் கேட்க பசையற்ற பதில்களையே பெற நேர்கிறது. நம் சமூகத்தில் பெரும்பான்மையான கணவன்கள் அப்படியானவர்கள் தானே! ஏன் இந்த சமூகமும் கூட அப்படித்தானே! மனம் விட்டு ஒருவரை பாராட்ட எப்போதுமே தயங்குகிற மனிதர்கள் தானே நாம். இலாவின் கணவனும் இந்த சமூகத்தின் சாயலுடனேயே உலாவுகிறான். வேலை, வேலை விட்டு வீடு வந்தால் அலைபேசி. அலைபேசி விட்டால் உறக்கம், உறக்கம் விட்டால் வேலை. அன்பிற்காக ஏங்குகிறாள் இலா. இலா மட்டும் தானா?
இலா, வீட்டு வேலை செய்ய மட்டுமே நிர்பந்திக்கப்பட்டிருக்கிற நம் காலத்து பெண்களின் மனசாட்சி. இலா ; நாம், அதாவது ஆண்கள் எங்கெல்லாம் மாறவேண்டும் எதிலெல்லாம் மாறவேண்டும் என்பதை சொல்லாமல் சொல்லிப்போகிறாள்.
தன் வீட்டு பால்கனியில் நின்றுக் கொண்டு யாருமற்ற இருள் படர்ந்த தன் வீட்டின் தனிமை தன்னைச் சூழ்ந்தபடியே புகைப்பிடிக்கிறார் பெர்னாண்டஸ். எதிர் வீட்டில் குடியிருப்பவர்கள் இரவுகளில் குடும்ப சகிதமாக உணவு உண்ணுவதை அவர்கள் வீட்டு சன்னலின் வழியாக அவர் பார்க்க நேர்கிறது தினமும். அப்படி அவர் எதிர் வீட்டை பார்த்து விட்டு திரும்பிய கையோடு பாலிதின் பைகளில் கட்டி பார்சலாக வாங்கி வந்த உணவுகளை தட்டில் இட்டு உண்ணுகிறார். வீடு முழுவதையுமே இருள் வியாபித்திருக்கிறது.
பெர்னாண்டஸை பார்க்கிற போதெல்லாம் பள்ளிக் காலங்களில் படித்த ஆஸ்கார் வைல்டின் ‘the selfish giant' கதைதான் நினைவுக்கு வருகிறது. தெருவில் கிரிக்கெட் விளையாடுகிற சிறுவர்கள் பெர்னாண்டஸின் வீட்டிற்குள் பந்து விழுந்துவிட அதனை எடுக்க தயங்கித் தயங்கி நுழைவு வாயிற் கதவினருகில் கூட்டமாக நிற்க, வேலை முடிந்து வீடு திரும்புகிற பெர்னாண்டஸ் அந்த குழந்தைகளை கண்டித்து துரத்தி விடுகிற காட்சியில் அவர் அப்படியே ஆஸ்கார் வைல்டின் கதையில் வரும் அந்த selfish giant தான். இப்படி நிறையக் காட்சிகள், படத்தில் குறைவான கதாபாத்திரங்களே தான் என்றாலும் கூட அத்தனையும் நிறைவு.
உறக்கம் தொலைத்த நேற்றைய இரவில்தான் இந்த படத்தினை காண வாய்த்தது. கணத்த இதயத்துடன் தனிமையில் உலாவும் சாஜன் பெர்னாண்டஸை போலவே இரவு முழுவதும் அலைந்திருக்கிறேன்.
இர்பான் காட்சிக்கு காட்சி கலங்கடிக்கிறார். முகத்தில் தவழும் சோகம், கண்களில் உறைந்துப் போயிருக்கும் தனிமை, இலா வந்த பின்னே முகத்தில் தோன்றும் மலர்ச்சி, புன்னகை என்று மனிதர் பெர்னாண்டஸாகவே வாழ்ந்திருக்கிறார்.
பெர்னாண்டஸாக மட்டுமல்ல இன்னும் தான் ஏற்று நடித்துவிட்டு போன பல கதாபாத்திரங்களின் வழியாகவே அவர் என்றென்றும் வாழ்வார். நம்முடனேயே ஜீவித்திருப்பார்.
லவ் யூ இர்பான்.
The lunch box
தற்போது netflixலும் காணலாம்.......
