வெறுமையின் வெளிச்சம்

ஏதோவொன்றிலிருந்து விடுபட
எப்போதும் ஏதோவொன்றைத் தேடி
அலைந்தபடியே இருக்கிறேன்
ஏதோவொன்றை தேடிப் பிடித்து பற்றிக்கொண்டால்
அது பாடாய் படுத்துகிறது
பைத்தியம் பிடித்துவிடும்போலிருக்கிறது
எனக்குள்ளே எனக்காகவென்று எப்போதும் இருக்கிற இரைச்சல் போதாதென்று இவைகள் வேறு
விழிகளை மூடி படுக்கையில் கவிழ்ந்தால்
விழிகள் பிதுங்கிக் கொண்டு
இமைகளை துருத்துகிறது
உறக்கத்தை தொலைத்து வருடங்களாகின்றன
உறங்குவதற்கு ஒரு மடி தேடியே
சதா அலைகிறேன்
சாத்தானின் மடிக்கு கூட சாத்தியமில்லாமலாகிறபோது
அமைதிக்கு நான் எங்கே போவது
யாரை தேடுவது
அறை முழுவுதும் புகையின் நெடி
சாராய நாற்றம்
வெறுமையே வெளிச்சம்
மீதமாய் கிடைத்த சில்லைறைகளையெல்லாம்
அடுக்கி வைத்து அண்ணாந்து பார்க்கிறேன்
இந்த வாழ்க்கை  இந்த அமைதி
என்னை ஒரு பிச்சைக்காரனாய் பார்க்கிறது
இன்னமும் நான் ஏதோவொன்றிலிருந்து விடுபட
ஏதோவொன்றை பற்றிக்கொள்ள
அலைந்தபடியே இருக்கிறேன்

அவைகள் எங்கிருந்து கிளம்பி வருகின்றன
உறுதியாக சொல்ல முடியவில்லை. கறையான்களை போல யாருக்கும் தெரியாமலேயே வருகின்றன.
நின்று நிதானமாக
கொஞ்சம் கூட மிச்சம் வைக்காமல்
வயிற் புடைக்க தின்று தீர்த்தது அவைகளுக்கு போதாதாம்
பற்களை கூர் தீட்டிக் கொண்டு விடிந்ததும் வருமாம்
சொல்லிவிட்டு செல்கின்றன.
இப்போது
அவைகள் எங்கு செல்கின்றன?
நம்புங்கள்!
எனக்கெதுவும் தெரியவில்லை

குறியின் பசி

அவனவனுக்கு மணமுடிக்க பெண்ணே கிடைக்க வில்லையென்று
குறிகளை மறைத்துக் கொண்டு அல்லாடுகிறான்
90ஸ் கிட்ஸ்களுக்கு திருமணமே ஆகாதென்று
சிலர் பகடி செய்துக் கொண்டிருக்கிறார்கள்
நான், அவளைப் புணர்வதற்கு  இடம் தேடித் திரிகிறேன்

தெருக்கள்தோறும் சாலைகள்தோறும்
அவளை இழுத்துக் கொண்டே திரிகிறேன்
எல்லா வீடுகளின் சன்னல்களும்
எல்லா வீட்டு கதவுகளும்
அடைத்தே இருக்கின்றன
அடைக்கப்பட்ட சன்னல்களைப் பாரத்துக் கொண்டும்
தாழிடப்பட்ட கதவுகளை கடந்துக் கொண்டும்
நான் மண்டைச் சூடேறி நடக்கிறேன்
எல்லா சன்னல்களுக்கு உள்ளிருந்தும்
ஒற்றை முனகல் சத்தம்
தடித்த ஆண் குரல்வளைகளிலிருந்து எழும் முனகல் சத்தம்
பெண்களின் குரல்கள்? அது காணவில்லை
யார் கவலைக் கொள்வார்? நான் கவலைப்பட்டேனா?
நான் இழுத்த இழுப்பிற்கு என் நிழலைப்போல ஓடிவருகிறாள்
அவள் குரலை நான் கடைசியாக எப்போது கேட்டேன்
நினைவில் கூட இல்லை.

அவள் மணிக்கட்டு சிவந்து கிடக்கிறது
வலி பொறுக்காமல் அவள் நடையின் வேகம் மட்டுப்பட்டுக் கொண்டே வருகிறது
நான் பொருட்படுத்தினேனா?
என் குறியின் பசிக்கு
நான் தீனி போட்டாக வேண்டும்.
என் குறியின் பசிக்கு நான் விதைத்தாக வேண்டும்
விதைத்ததை அறுவடை செய்தாக வேண்டும்
விதைப்பதற்கும் அறுவடை செய்வதற்கும் நிலம்?

வீடற்று வீதியில் ஒதுங்கி
நடைமேடையில் கூட்டத்தோடு ஒண்டி வாழ்பவனுக்கு
விதைப்பதற்கும் அறுவடை செய்துக் கொள்வதற்கும்
காலமும் நிலமும் ஏது?

வீதிகளெங்கும் திரிகிறேன்
தூரத்தில் ஒரு ஆண் நாய்
பெட்டை நாயின் புட்டத்தை மோப்பம் பிடித்தபடி நகர்கிறது
பெட்டை நாய் இசைந்து கொடுக்கிறது
என் நிழலை, நான் திரும்பிப் பார்க்கிறேன்
நிழலின் மேல் அவளே தெரிகிறாள்
மணிக்கட்டில் வலி அவளுக்கு, பசிவேறு
வயிற்றுப்பசி தான், என் பசியல்ல
அவள் என் புட்டத்தை மோப்பம் பிடிக்கவில்லை
இசைவுத் தெரிவிப்பாள் என்று கூட எனக்கு தோன்றவில்லை
இருந்தும் நான் இடம் தேடித் திரிகிறேன்
அவளைப் புணர்வதற்கு

புகை

இவன் இயற்கை எய்தினானென

யாரும் சொல்லத்தேவையில்லை

என் சாவிற்கான அத்தனை காரணங்களையும்

கொடுத்துவிட்டே போகிறேன்

அதிலொன்று விரலிடுக்கில் 

சுவாசித்துக் கொண்டிருக்கிறது

பனித் துளி

அவள் கூந்தல்
தொட்டு
தொலைந்துவிட
இரவெல்லாம்
தவமிருகிறது
பூவில் படர்ந்த
பனித்துளி............

உறக்கம்

உறக்கம் உறுதியான ஒன்று
சிலருக்கு படுத்ததும் வந்துவிடும்
பலரை அது பாடாய்படுத்தும்
உறக்கம் உறுதியான ஒன்றுதான்
ஆனால்
உறங்கியவர் எவரும் விழிக்கபோவதில்லை

தேன் நிலவு

உன் வளைவு நெளிவுகளை

பார்ப்பதற்கும்

தொட்டு- காமத்தீ

குழிப்பதற்கும்தானா

இத்தனை 
வளைவு நெளிவு கடந்து

மலை உச்சியில்

குளிர்ந்து கிடக்கிறேன்

உன் மொத்தம் கண்டு

என் புத்தி பிரண்டு

சித்தம் கலங்கி

உன் பாதம் பனிந்து

அம்மம்மா! நீ

கட்டிலின்மேல் ராட்சசி

கட்டவிழ்க்காதே என்மேல்

காமத்தீ

ஐய்யையோ!

பகல் எது – இரவெது

பைத்தியம் பிடிக்கிறது

பாவம்! நானோர் பிள்ளை

நித்தம் உன் தொல்லை

விழிகொண்டு வீழ்த்தி

உன் மார்பில்  

என் முகம் புதைக்கிறாய்

உன் இடையில்

என் விரல் வளைக்கிறாய்

அதன் மடிப்பில்

எனை திருடுகிறாய்

உன் பாதம் எத்தி

என் மார்பை மிதித்து 

உன் பக்கம் இழுத்து

முத்தம் வைக்கிறாய்

இதழ் முத்தம் பறிக்கிறாய்

கட்டிலின்மேல் ராட்சசி நீ

நிதமும் கிடைக்குமா

இதே தரிசனம்?

இந்த தேன் நிலவைப்போல்

எல்லா இரவுகளும்

முதல் இரவுகளாகவே இருக்கட்டும்

முற்றும் துறப்போம்

ஆடைகள் மட்டும் அல்ல

ஆண் பெண்னென்ற பேதங்களையும்

கர்வம் கலைப்போம்

காமம் தீர்ப்போம்

காமம் கடந்து

காதல் வளர்ப்போம்

உன்மேல் நானும்

என்மேல் நீயும்…..

பாவம் அந்த கடவுள்

இறைவன் என்பீர்கள்
வாய் நிறைய
நிதர்சனத்தில்
பாவம் அந்த கடவுள்
தினம் தினம்
மார் பிடித்து இழுத்து
வெடுக் வெடுக்கென
முளை காம்பிழுத்து
நா ருசிப்பீர்கள்
உடல் வளர்ப்பீர்கள்
வா வந்து
என் மார் வருடு
அதை தீண்டித் திளை
தொட்டு ரசி
அருந்தி மகிழ் என்று
விரும்பி வந்து
பால்மடி காட்டியதா? பசு
இப்படி ஒரு பக்தன்
எந்த கடவுளுக்கு வாய்ப்பான்
இது வதை என்று
தெரியவில்லையா?
ருசிக்கு ஒருவேளை பாலின்றி
இருந்திடுமா?
தடை சொல்லும் - உங்கள்
பணம் படைத்த தடித்த நாக்குகள்?
தடை விதிப்பதற்கு முன்னால்

மீண்டும் காதலானேன்

மீண்டும் காதலானேன்

நேற்று ஒருவனை காதலித்தேன்
அடித்து மிதித்து பயமுறுத்தி
எவனோ ஒருவனுக்கு
தாரை வார்த்தார்கள்
நட்பும் இல்லை
காதலும் இல்லை
இதுநாள் வரையில்
நதியில் விழுந்த மரகட்டையாக
நகர்ந்த என் வாழ்வில்
எங்கிருந்தோ வந்தான்- நட்பானான்
பின்னொருநாளில் காதல் என்றான்
கட்டியவன் காட்டாத
அன்பை, காதலை
கண்டநாள் முதல்
அள்ளி என்மீது தெளிக்கிறான்
நான் மீண்டும் காதலானேன்
மீண்டும் எல்லோரும் வந்தார்கள்
வேண்டாம் என்றார்கள்
இம்முறை என் காதலுக்கு
புது பெயரும் வைத்திருந்தார்கள்
‘கள்ளக் காதல்' என்று

மே 2017